Maithili mansahari khanpan mans ( matan kari)

maithili khanpan mans

मासु (मटन कड़ी):-


सामग्री:-
सरसों तेल,जीरा,सबटा गरम मसाला,प्याज - ६ टा महीन काटल
लहसुन आ अदरक के पेस्ट - २-३ चम्मच,धनिया पाउडर - २ चम्मच
मिर्च पाउडर - २ चम्मच,टमाटर - १ टा नमहर,मासु - आधा किलो,नमक - स्वाद के अनुसार

बनेबाक विधि :-
कराही मे सरसों तेल गरम करू । एहि मे जीरा दऽ दियौ आ एकरा फूटय दियौ । तुरंत सबटा गरम मसाला मिला दियौ आ एकरा कड़कय दियौ । आब काटल प्याज दऽ दियौ । प्याज के कनेक लाल होमय दियौ । आब लहसुन आ अदरक के पेस्ट मिला दियौ । हल्दी, धनिया आ लाल मिर्च पाउडर के २ चम्मच पानि मे पेस्ट बना लिअ आ एकरा कराही मे दऽ दियौ । काटल टमाटर के सेहो एखने मिला दियौ । नीक सँ सब किछु के मिला दियौ । जहन मसाला आधा पाकि जाय तँ एहि मे मासु मिला दियौ। आँच तेज कऽ दियौ आ मासुक टुकड़ी के २-३ मिनट धरि पकाउ । लगातार लाड़ैत रहू। आँच के कम कऽ दियौ । आब ढ़कि के बनाउ । एकरा लगातार लाड़ैत रहू ताकि गरम मसाला बरतन के पेन मे नहि लगैक । यदि मसाला लागय लगै तँ कनेक पानि मिला दियौ । एहि समय मे नमक मिला दियौ । जहन मसाला सँ तेल अलग होमय लागय तँ १० मिनट धरि बिना ढ़कने बनाउ। आब एहि मे गरम पानि मिला दियौ आ एकरा उबलय दियौ । जहन झोर तैयार भऽ जाय तँ आँच के बंद कऽ दियौ । आब मासु तैयार अछि ।
चिड़ैयाक मासु :-
चिड़ैया पालतू पक्षी नहि अछि । एकर शिकार कएल जाइत अछि । मिथिलांचल मे लोक चिड़ै के चमड़ा सहित बनायब पसंद करैत छथि, ताकि एकर मूल स्वाद विद्यमान रहैक ।
सामग्री:-
चिड़ैया - १,प्याज - ५०० ग्राम,अदरक - ३० ग्राम,लहसुन - ३० ग्राम,हल्दी पाउडर - ३० ग्राम
धनिया पाउडर - ३० ग्राम,मिर्च पाउडर - १० ग्राम,जीरा पाउडर - ३० ग्राम
सरसो तेल - ३० ग्राम,सबटा गरम मसाला,हींग (ऐच्छिक) - ४-५ ग्राम,काटल धनिया के पत्ता
बनेबाक विधि :-
चिड़ैया के धो कऽ साफ करू आ तेज आँच पर टाँगि दियौ । १०० ग्राम प्याज के अदरक आ लहसुन के संग पेस्ट बना लिअ आ बाँकी प्याज के काटि लिअ । चिड़ैया के काटि लिअ आ नमक, हल्दी आ कनेक सरसों तेलक संग तरि लिअ । कराही मे तेल गरम करू आ एहि मे सभटा गरम मसाला दऽ दियौ । जहन इ कड़कय लागय तँ एहि मे प्याज मिला दियौ । कनेक नमक दऽ दियौ । अदरक, लहसुन आ प्याज के पेस्ट दऽ दियौ । आब एकरा फ्राय करू । पाउडर वला मसाला दऽ दियौ आ ८-१० मिनट धरि पकाउ जा धरि कि मसाला के कच्चापन ने खतम भऽ जाय । तरल मासु के मिला दियौ आ एकरा मसाला के मिश्रणक संग फ्राय करू । मासु के ढ़कबा धरि एहि मे पानि मिला दियौ। १० मिनट धरि बड़कय दियौ जा धरि की मासु सिद्ध ने भऽ जाय । एहि मे एक चम्मच घी मिला दियौ । एहि मे काटल धनिया पत्ता मिला के एकरा परसू ।

Tags - maithili, maithili khanpan, maithili mansahari khana, maithili mansahari khanapan, mans maithili khana, mans banebak bidhi