Maithili Comedy : jay prakash choudhary janak maithili comedy : उलहन

उलहन 

हे सरस्वती तोरो चलती, दिन-दिन हैत मलान !!

तजलक पूजा सब विद्यालय, नाम न लैछ महाविद्यालय !

मत मातल घमशान उपद्रव, जहिया मूर्ति भसान !!

हे सरस्वती तोरो चलती, दिन-दिन हैत मलान !!

बाट बन्न अछि तोरे नामे, माघ बैरियर गामे-गामे !

समय गमायब, कथो सुनए मुक्का थापड़ कोचवान !!

हे सरस्वती तोरो चलती, दिन-दिन हैत मलान !!

किए करत कियो तोहर अरधान, के पबैत अछि बड़का अन-धन !

तोहर देल कागत सबूत ल' ढहनाइछ  बबुआन !!

हे सरस्वती तोरो चलती, दिन-दिन हैत मलान !!

टॉप योग्यता पौने बौआ, तैयो चाही कसगर ढोआ!

से लक्ष्मीक कृपे सँ भेटए , तैं हुनक गुणगान !!

हे सरस्वती तोरो चलती, दिन-दिन हैत मलान !!

बरदे सौंसे देशक देवा, जरसिक सेवा सध: मेवा !

जते पढुआ तते लफुआ, धनि किसान भगवान !!

हे सरस्वती तोरो चलती, दिन-दिन हैत मलान !!

रटलनि वेद हमर परबाबा, फंकलनि छुच्छे धानक लाबा !

वैह कर्म हम फेर करू, बरु फोलब पान दोकान !!

हे सरस्वती तोरो चलती, दिन-दिन हैत मलान !!

दूइर भेल इ हाथक वीणा, एकरा बजबए नगन हसीना !

टेप सिनेमा टेलीविजनो, गिरलक गान बजान !!

हे सरस्वती तोरो चलती, दिन-दिन हैत मलान !!

विद्या पढने बेरोजगारी, करै तिरस्कृत अपने नारी !

बिना नोन रोटिक नियोजन, सरकारी अनुदान !!

हे सरस्वती तोरो चलती, दिन-दिन हैत मलान !!

सौतिन तोहर परम लक्ष्मीनियाँ, तोरा सेवकक ओ दुश्मनियाँ !

अन्न बिना ओ मारि सकै, से ओकरा लेल असान!!

हे सरस्वती तोरो चलती, दिन-दिन हैत मलान !!

कनडेरियो जौं कने तकै छह, छाहरी तरक पाइ धरि दै छह !

ठिकेदार सन गुम्बज नहि हो, सगर देश सम्मान !!

हे सरस्वती तोरो चलती, दिन-दिन हैत मलान !!  

लेखक:- जय प्रकाश चौधरी"जनक"
साभार:- जय प्रकाश चौधरी"जनक"
प्रस्तुति:- राजीव मिश्र(अपन मिथला धाम)

Tag: maithli comedy, maithli chutkala, jay prakash choudhary maithli poetry, janak jee ke kavita, janak jee ke chutkal, maithli comedy of janak jee: Korthu